Vettvangsferðir faghópa og verkefnisstjórnar sumarið 2015
Nú í sumar hafa faghópar og verkefnisstjórn 3. áfanga rammaáætlunar ferðast töluvert um landið til að kynna sér þau landsvæði sem eru til umfjöllunar hjá þeim.
Faghópar rammaáætlunar sinna því mikilvæga hlutverki að leggja faglegt mat á náttúrugæði og menningarminjar á svæðum í rammaáætlun og væntanlegum áhrifum virkjunarframkvæmda á þessa þætti. Faghóparnir skoða einnig samfélagsleg áhrif virkjana og áhrif þeirra á hagræna þætti. Til að geta sinnt þessu starfi sem best er mikilvægt að meðlimir faghópanna hafi sem allra besta þekkingu á og yfirsýn yfir þau svæði sem unnið er með. Vettvangsferðir eru því snar þáttur í starfi faghópanna. Sama er að segja um verkefnisstjórn rammaáætlunar.
Faghópar 3. áfanga rammaáætlunar hafa farið í þrjár vettvangsferðir í sumar. Miðvikudaginn 3. júní fóru þeir í dagsferð á Reykjanes að kynna sér virkjunarhugmyndir á vegum HS Orku þar. Helgina 25.-26. júlí var svo haldið í tveggja daga ferð um Norðurland og Kjöl og virkjunarkostir á vegum Landsvirkjunar, Hrafnabjarga ehf., Héraðsvatna ehf. og Íslenskrar vatnsorku ehf. skoðaðir. Síðasta ferð sumarsins var svo farin helgina 5.-6. september á Suðurland og Sprengisand, þegar virkjunarkostir á vegum Landsvirkjunar, Orkusölunnar og Suðurorku ehf. voru skoðaðir.
Sérfræðingar í faghópunum tóku virkan þátt í leiðsögn um svæðin og greindu frá nýjustu þekkingu á sérsviðum sínum. Stefnt er að því að faghóparnir fari í eina vettvangsferð enn í haust, til að kynna sér virkjunarkosti á Hengilssvæðinu.
Verkefnisstjórn 3. áfanga rammaáætlunar fór í eina vettvangsferð í sumar. Fimmtudaginn 13. ágúst heimsótti verkefnisstjórnin virkjunarkosti í Stóru-Laxá, á vegum Landsvirkjunar, og við Búðartungu, á vegum Íslenskrar vatnsorku.
Í öllum þessum ferðum áttu bæði náttúruverndarsamtök og Orkustofnun fulltrúa og einnig slógust fulltrúar sveitarfélaga á svæðunum í för um þau svæði sem þeim tilheyra. Landsnet átti fulltrúa í ferð verkefnisstjórnar. Faghóparnir og verkefnisstjórnin hafa þannig haft samráð við mikinn fjölda aðila í þessum ferðum, eða tæplega 60 manns.
Skýrslur um ferðirnar með nánari upplýsingum má nálgast undir flipum fyrir vettvangsferðir faghópa og vettvangsferðir verkefnisstjórnar.
* Síðast breytt 09.11.2015 kl. 10:45. Ástæða: Leiðrétting á þátttöku Landsnets í ferðum.